平時有唔少機會抱喵，其實一開始就知道兩位主人好重，尤其是楊生，抱落去仲重過公司喵好多好多…之前用過屋企個浴室磅黎磅，結果係18磅！不過個磅本身好舊，唔知準唔準，所以都只係估估下既啫。

直到今日屋企突然多左部電視，擺放多時既Wii終於出山喇！配合埋Wii Fit Plus，我好高興喺呢度同大家宣布兩位主人既重量：

楊太係 4.6kg = 10.1lb

楊生係 6.6kg = 14.5lb

欽此，退朝！

七八月唔知點解咁少時間寫blog…唔理啦，其實係想講番七月既事情。

一直都會見到兩位主人周不時爽歪歪R痕，亦間中見到楊太向天叫。佢地兩個有唔少神奇舉動，呢個可能遲下慢慢講，不過今次發現有蚤呢，其實都幾好笑。

話說工人有日帶左位台灣朋友墨香墨嗓上黎睇睇兩位主人，隨後就有一部相機就係咁自動影左好多相喇。過幾日，工人就諗住幫主人滴蚤藥啦，反正每月都好應該都做一次架嘛。事實上主人黎之前已經全屋放過蚤蛋，而佢地入伙之後，其實係未滴過蚤藥既。

滴完蚤藥幾日，我竟然發現楊太頭頂有粒神奇會郁既黑色物體，一照、一捉，放落水，望真d…真係蚤黎架！聽聞滴完蚤藥之後，蚤係停留唔到喵身上面架喎，到底發生左乜事呢？楊太答唔到你，只係知道後來痕少左，R少左，痴人又多左，OK啦～

 

後來收到當晚影既相，竟然俾我見到楊太下巴有一粒「異物」啊！！！囧rz

楊生楊太入伙時，從舊工人口中已經知道佢地至少兩個月無剪過指甲，之前又唔知有冇剪過，抱佢地又非常困難，所以一直想幫佢地剪甲，只係工人為保小命，實在唔敢隨便郁手…數數下咁就住左兩個月，即係至少四個月無剪過剪甲，工人日日生活在徨恐不安之中…

呢幾日我就好努力咁同楊太玩腳仔，R下肉球又抨下指甲，等佢習慣呢種「手感」係安全既。初時佢直頭收埋兩隻手唔俾摸，後來我就試下趁佢顧住梳毛唔理手仔既時候，多d同佢接觸，都睇得出佢抗拒係少左既～

終於！尋晚我用多少少力捉佢手，佢嘗試縮又縮唔到，竟然選擇放棄唔郁！機會難逢呀，梗係郁手剪啦，一剪就剪晒咁多隻甲～雖然唔係剪得好多，但起碼無咁尖，都係好事啦 😀

不過剪既角度唔太好，手毛又多過乜咁，其實我剪既時候係連埋毛一齊剪 XD

真係唔覺唔覺咁就住左兩個月，兩位主人繼續情緒化，而工人就繼續不時受下皮外傷咁啦… T_T

不過明顯見到佢地d毛靚左，同埋好似又肥左d… Orz 算啦，依家都只係相處左無耐啫。

七一撞正星期日，所以七月二號突然變左公眾假期。連續假期，做工人邊有咁多日假放丫，呢個時候梗係趁機會大掃除，清潔一下、又同楊生楊太培養一下感情。

抱佢地真係好困難，不過依家都已經易左好多架喇，佢地日日係咁鈎住d野都真係無辦法，所以呢排我地就冒死去不斷抱佢地，由好驚到無咁驚（你以為啦，其實都係咁驚…），直到七月二號，終於有一個好偶然既機會底下，我地終於成功剪到楊生既指甲喇！

其實楊生都幾抵死，一方面無間斷地喵你親近你，另一方面又好努力地避開我地既手，一抱住就直頭想發癲添，差在唔係幾主動攻擊架咋。

本來我地都有諗過乘勝追擊，幫楊太剪埋…結果只係抱左幾十秒，掂腳都ok，但一到摸指甲就立刻逃脫！

無法啦，剪甲尚未成功，工人仍需努力呀～

哇，真係唔覺，咁就一個月喇～由最初睇相（相睇）到搬屋入伙，相處左只係幾日既時間，當時真係有中左伏既感覺：真係從未試過遇到咁有attack skill既喵，好驚佢地以後都係keep住戰鬥格…

好在，到依家一個月喇，佢地都終於穩定左好多，楊生雖然無頭一兩日咁痴住人，但係唔怕陌生人其實都有另一種好玩 😀 而楊太就安定左好多，間唔中都會想咬人爪人，不過伸爪既機會少左好多，同埋只要唔觸動佢某d神經，其實佢又唔會咁衝動既。與其話佢地馴左，不如話我開始知道點樣同佢地相處。

不過目前仲有小問題，一係要帶佢地睇醫生定期檢查，二係考慮轉糧，三係剪指甲 – 問下醫生轉唔轉糧好，因為我見食開Royal Canin乾糧既喵毛真係會好好多，所以要認真考慮，而現時包舊糧就快食晒，所以可能要盡快行事；剪指甲方面我真係唔知點做好，一方面無經驗，另一方面係佢地仲未抱得，咁應該點剪呢？我要著生化衣？ XD

呢排好多野諗緊，真係要逐一擊破啊～

今篇文唔放相，一來懶，二來都唔知揀乜好（可以懶懶地咁寫文係一種動力黎架！）

同楊生楊太相處左都有半個月喇，其實中間發生左好多事情，搞到佢地兩個一時驚到死，一時又痴人痴到死。最初楊生比較快習慣環境，依家反而係比較怕既；楊太最初日日都唔見人，依家基本上好易就可以見到佢 – 當然見到生面口既人又另計啦，楊太依然唔見人，而楊生就會戰戰兢兢咁留守，成日處於走與唔走之間…

其實直到依家，我對楊生楊太都仲係有好多野唔知道，例如點解佢地從小到大都係家貓，但點解佢地條尾都睇落唔正常？同埋據說楊太曾經受過虐待，到底又係乜野事情呢？佢地大約邊日生日？好多好多事情我都想知。

其實佢地一d都唔易相處，開心少少就咬人爪人，唔開心又係咬人爪人，而且好喜歡搵地方隱藏，我唔係好信我屋企人能夠應付到囉，叫佢地唔可以隨便開窗就夠死啦～ XD

唯一叫做有d成就，就係佢地完全無爪爛紙皮箱！好在買左個貓傢私啫…如果買早一日會更好 T_T

影喵相其實好多樂趣，雖然有時真係過下手癮就算，但其實我都好似影左幾年街喵未厭…不過有時都會覺得佢地日日都擺類似既pose幾悶，所以影唔落手。所以就趁依家七日鮮，影多d！

不過楊生真係好好笑，佢已經習慣左四腳唔到地，即係將個身完整地反轉；如果呢個時候搞下佢，就會碌來碌去，而今次呢一輯相，應該係萬中無一既情況：

• 本來只係普通既訓低

• 然後發現我行埋去影相

• 出事喇出事喇，佢轉身喇！你睇下佢呢個角度似乜野？

 

 

 

 

 

 

 

 

 

 

• 打直睇，佢根本就係企喺度！

兩公婆之中，楊生係比較快適應既，無論對人還是對環境都係，雖然星期日入伙到依家都未有大便。

有時候楊生真係好煩，因為佢粘人粘得好勁！不過單係friendly其實已經嬴晒，至少可以見得到丫嘛。

第二日放工返黎，一開門就見到楊太由地下跳上去枱面準備再跳上去櫃頂，不過中途已經停左手俾我任摸 XD 而楊生就係咁喵喵叫，但我一時間真係搵唔到佢…點知一開廚房燈，我就見到佢企定定在鋅盆裡面！我就即時影左幾張相…真係表情多到呢！

星期日十一點左右，楊生楊太就由兩位舊工人抬過黎新居，楊生一路叫到七彩，楊太就好靜縮埋一舊，不過楊太既右眼眼眉位置好似損左少少，可能緊張亂撞撞損啦。

兩位舊工人將一大箱超大既Cats Best貓砂、兩包貓糧同埋砂盤移交過黎，新舊工人傾左一陣交換完情報，工作就正式由新工人負責喇～雖然間屋已經執好晒，從未試過咁乾淨，但畢竟楊生楊太第一次睇樓，真係睇得好小心好慢…仲勁驚青添。佢地可以自由活動既位置主要係廳同埋廚房，當然已經收埋晒所有有危險既野先啦。

晏d出去買左幾把貓梳，同埋一包應該好吸引既芝士味貓零食（應該唔會咁快開），再補買比較重身既木貓砂，終於可以安心去食飯…番黎當然又要搵佢地去左邊（正宗躲貓貓就係咁），結果楊生去左梳化後面，楊太就上左某個櫃頂…如是者，楊生好快就放開懷抱自由活動，而楊太就做足CCTV十幾個鐘，完全無意慾落黎食野 – 或者有，只係襯我地落街食野時出動卦？

為左紀念呢一日，我拍左好多片，仲剪輯起黎以作留念 😀