就係咁，楊生楊太轉左工人一年喇，工人由一開波領教到佢地既殺傷力、直到依家都日日嗲到癲，進步雖然已經好大，但進步空間依然好大…
工人們依然好鬼忙，最近有好多事情無寫到出黎，不如我預告黎緊會補寫番乜野事件啦：
- 與第三者同居
- 又搬屋（不過唔換工人）
- 楊先生睇醫生食藥
唉，真係好多野要趕住做，依家匆匆寫完呢段字，我又要趕住去訓覺喇，好忙啊～～～～
分類: 搬屋大小事
-
工人與主人相識一週年了
-
入伙半年喇
係囉，咁就半年咯，真係唔覺唔覺…
依家佢地兩個又嗲又乖，真係好好玩 😀
舊工人幾時有空上黎探下佢地？
-
入伙五個月
據說另一位工人係喵仔剋星，所有照顧過既男主人都過唔到五個月命，所以呢幾日我地非常之集中留意楊先生既動向，睇佢會唔會無啦啦死鬼左…
結果係無既！
由於詛咒已被破解，所以佢應該會長命百歲，點都唔會死（哇～～～）
最近楊生楊太都會上床訓，楊太已經無以前咁驚青，玩肚仔都已經無問題，有時候有人按門鐘仲直頭唔走添 – 楊生會走，但通常見自己走唔切就會回頭同大家親近親近 XD
至於腸胃方面，我終於幫佢地轉晒喵糧做Royal Canin Light 40，可能因為係純減肥糧既閣係，楊先生明顯地食慾不振 😀 但其實肚餓終歸都會食，所以半個月以來，佢地各輕左…100g咁大把 Orz 不過便便多左好多，同埋明顯地無咁臭，點都係一件好事黎既。
喵砂就比較難搞d，今次買返黎同上次都係同款，不過唔知點解有時唔係幾結舊，同埋兩位主人腳仔散播到四圍都係喵砂，屋企有沙漠化既跡象！無既，每日掃幾次地咁啦…
-
住滿兩個月
真係唔覺唔覺咁就住左兩個月，兩位主人繼續情緒化，而工人就繼續不時受下皮外傷咁啦… T_T
不過明顯見到佢地d毛靚左，同埋好似又肥左d… Orz 算啦，依家都只係相處左無耐啫。
-
入伙滿月
哇，真係唔覺，咁就一個月喇～由最初睇相（相睇）到搬屋入伙，相處左只係幾日既時間，當時真係有中左伏既感覺：真係從未試過遇到咁有attack skill既喵，好驚佢地以後都係keep住戰鬥格…
好在，到依家一個月喇，佢地都終於穩定左好多，楊生雖然無頭一兩日咁痴住人，但係唔怕陌生人其實都有另一種好玩 😀 而楊太就安定左好多，間唔中都會想咬人爪人，不過伸爪既機會少左好多，同埋只要唔觸動佢某d神經，其實佢又唔會咁衝動既。與其話佢地馴左，不如話我開始知道點樣同佢地相處。
不過目前仲有小問題，一係要帶佢地睇醫生定期檢查，二係考慮轉糧，三係剪指甲 – 問下醫生轉唔轉糧好，因為我見食開Royal Canin乾糧既喵毛真係會好好多，所以要認真考慮，而現時包舊糧就快食晒，所以可能要盡快行事；剪指甲方面我真係唔知點做好，一方面無經驗，另一方面係佢地仲未抱得，咁應該點剪呢？我要著生化衣？ XD
呢排好多野諗緊，真係要逐一擊破啊～
-
新居入伙
星期日十一點左右，楊生楊太就由兩位舊工人抬過黎新居，楊生一路叫到七彩，楊太就好靜縮埋一舊，不過楊太既右眼眼眉位置好似損左少少，可能緊張亂撞撞損啦。
兩位舊工人將一大箱超大既Cats Best貓砂、兩包貓糧同埋砂盤移交過黎，新舊工人傾左一陣交換完情報，工作就正式由新工人負責喇～雖然間屋已經執好晒，從未試過咁乾淨，但畢竟楊生楊太第一次睇樓，真係睇得好小心好慢…仲勁驚青添。佢地可以自由活動既位置主要係廳同埋廚房，當然已經收埋晒所有有危險既野先啦。
晏d出去買左幾把貓梳，同埋一包應該好吸引既芝士味貓零食（應該唔會咁快開），再補買比較重身既木貓砂，終於可以安心去食飯…番黎當然又要搵佢地去左邊（正宗躲貓貓就係咁），結果楊生去左梳化後面，楊太就上左某個櫃頂…如是者，楊生好快就放開懷抱自由活動，而楊太就做足CCTV十幾個鐘，完全無意慾落黎食野 – 或者有，只係襯我地落街食野時出動卦？
為左紀念呢一日，我拍左好多片，仲剪輯起黎以作留念 😀
-
上網搵屋搬
有日上網見到有兩隻喵話要搵屋搬，見佢地咁急搵地方，我又諗左一晚，決定應徵做工人。
其實經過月初親身照顧兩隻喵一個星期，大約感受到原來養喵要做的工夫實在唔少，花時間既地方主要都係溝通同清潔，要付出既金錢反而比最初想像中要少好多、甚至應該係可以慳到錢（當然獸醫條數係另計）。
好喇，既然幫佢地搵到屋搬，就算唔裝修都要做下清潔，先至可以俾喵入黎住架嘛，唔通等佢地捐黎捐去成身塵咩？結果執屋執到一頭煙，規模仲大過最近兩三年所有既大掃除，真係辛苦到爆！ 因為唔知道兩隻喵會帶幾多傢俱電器食物用品過黎，所以佢地未入伙之前，都係普普通通、Window Shopping一下先～