嘟嘟嘟～終於的起心肝幫兩位主人既重量公告天下喇～其實自從楊先生食左醫生署方減肥糧之後，佢真係瘦番去剛剛入伙既重量，依家跳多左、玩多左，又嗲左 XD 依家轉番之前食開既減肥糧都可以好好保持體重，唔錯～
楊太太就一直keep得好好，無起跌 🙂
好喇，報數時間：
楊生係 6.5kg = 14.3lb
而楊太係 4.5kg = 9.9lb
楊生堅係輕左好多，正呀～～～～
分類: 健康大小事
-
楊先生有新花名
即係咁，其實楊先生一遇到工人，工人就已經叫佢做「楊生」、「楊先生」，後來就因為佢性格同文字描述一樣，所以叫佢做「很嗲」；間中就叫佢做「阿仔」，又或者「喵」，仲有根據客觀事實而叫既「肥仔」同「肥野」，基本上佢全部都係會應既。（不過就算你叫佢做楊太太，都係會應架啦…）
今日多一個名，其實係因為佢實在生產便便數量、速度都非常驚人，再加上本來就唔係好識得用喵砂，所以次次都臭死人，今日終於要叫佢做「Shit Machine」喇～
我總係覺得Shit Machine應該係生產力促進局派黎我屋企既餓底… Orz
-
楊生楊太第一支針
其實每次當我見到Facebook入面有人話自己隻喵需要輸血，我就好想拎楊先生去瘦醫度放血 – 呀唔係，係捐血先啱。以呢隻咁好肉地又乖又大食又嗲既喵，其實係好應該為地球作出一啲貢獻既…雖然工人最想佢地自己賺喵糧同喵砂，唉，最後咪又係我自己買？不過點都好，少病是福，所以最好都係做好預防措施，打好針先，至少唔打針的話，就連捐血都唔洗諗，係咪？
今次一約就約晒楊生楊太兩位主人一齊去打針，一大一細袋，重到呢…
楊太太好乖，好定，全程都好靜，又無乜反抗～
至於楊先生…當然就一如以往地好多野講啦，由頭到尾都叫唔停，仲好大聲～
不過佢唔曳嘅時候又真係好乖既。一刻囉。
楊太太當然就定好多啦，不過唔知點解出到黎診所有少少流眼水。
等佢地再靜番啲，我地就開拉鍵俾兩位主人視察一下四週。
隔左排入到去見瘦醫，好快就磅重打針，楊先生個靚樣殺晒醫生護士，仲俾人叫佢做貓巴士添呀 XD
不過貓巴士都係要打針，無得走。
楊太太上磅不知幾咁定，不過有合埋口時有少少嚇親醫生，幾驚一個唔小心就又有血案呀 Orz
楊太太打針都好定，仲發出比以前更嗲嘅功夫出黎，嬴晒～
因為唔知道以前有無打過針，所以為安全起見，下個月又要打多次針喇…
-
工人與主人相識一週年了
就係咁，楊生楊太轉左工人一年喇，工人由一開波領教到佢地既殺傷力、直到依家都日日嗲到癲，進步雖然已經好大，但進步空間依然好大…
工人們依然好鬼忙，最近有好多事情無寫到出黎，不如我預告黎緊會補寫番乜野事件啦：
- 與第三者同居
- 又搬屋（不過唔換工人）
- 楊先生睇醫生食藥
唉，真係好多野要趕住做，依家匆匆寫完呢段字，我又要趕住去訓覺喇，好忙啊～～～～
-
肥喵磅重（2013年2月）
今個冬天天氣好怪，時冷時熱又易病，攪到工人身體唔見太好…相反兩位主人好食好住，即使減左糧，體重都係一直上升…
以前係一餐長糧160g，依家係兩餐長糧70g + 70g，即係每日減左20g，依然比建議份量（90g x 2）差好遠，點解兩位主人咁吸收？ Orz
好喇，報數時間：
楊生係 7.2kg = 15.9lb
而楊太係 4.8kg = 10.6lb
楊生已經日日打波架啦，點解會咁架 囧
-
肥喵磅重（2013年1月）
又黎到磅重既時間喇～兩位主人最近雖然經歷過食花事件，但係依然無阻佢地既食慾，食野比平時多左每日20g左右（平時每日每隻60g，建議份量係90g，所以都未餵過龍）。
可能因為冬天所以郁少左既關係（但我唔覺囉），佢地都加左磅：
楊生係 7kg = 15.4lb
而楊太係 4.7kg = 10.4lb
報告完畢！
-
摧花殺手 – 楊生嘔到癲
聖誕前夕，工人拎左少少公司剩餘物資返屋企 – 三束花，諗住擺黎睇下都好，點知主人們非常有興趣，終於都出事…
當然放花入屋之前，我都知道有d花係唔放得既，例如有毒性既百合咁。因為d花都真係好多，同埋未有咁大個花樽，所以最後都係唔敢放出廳，轉而放左好多日廁所。
終於…第二朝我見到廁所門口推開左，成地都係嘔漬 ~_~ 而嘔既只有楊先生一隻，嘔到成隻喵謝謝地皮，真係陰公豬咯～～～當然唔鬧佢係唔得既，不過對住一隻狂嘔既喵又真係唔太忍心，所以工人最後都只係再次將d花隔離、收埋晒d唔濕得水既野，如果唔係萬一佢嘔左落去…咁就大鑊架喇 Orz
最後楊先生全日謝晒，過兩日先至精神番，無病痛已經算好好彩架喇 囧
-
肥喵磅重（2012年11月）
好耐無公佈兩位主人既重量喇！大家留意～～～～～
楊生係 6.4kg = 14.1lb
而楊太係 4.2kg = 9.3lb
兩位主人都輕左，不過明顯見到楊太輕得比較多…一來係轉左減肥糧（但係其實份量多左），二來楊太磅重當日食左幾啖就行開左，所以磅落比較輕 😛
-
入伙五個月
據說另一位工人係喵仔剋星，所有照顧過既男主人都過唔到五個月命，所以呢幾日我地非常之集中留意楊先生既動向，睇佢會唔會無啦啦死鬼左…
結果係無既！
由於詛咒已被破解，所以佢應該會長命百歲，點都唔會死（哇～～～）
最近楊生楊太都會上床訓，楊太已經無以前咁驚青，玩肚仔都已經無問題，有時候有人按門鐘仲直頭唔走添 – 楊生會走，但通常見自己走唔切就會回頭同大家親近親近 XD
至於腸胃方面，我終於幫佢地轉晒喵糧做Royal Canin Light 40，可能因為係純減肥糧既閣係，楊先生明顯地食慾不振 😀 但其實肚餓終歸都會食，所以半個月以來，佢地各輕左…100g咁大把 Orz 不過便便多左好多，同埋明顯地無咁臭，點都係一件好事黎既。
喵砂就比較難搞d，今次買返黎同上次都係同款，不過唔知點解有時唔係幾結舊，同埋兩位主人腳仔散播到四圍都係喵砂，屋企有沙漠化既跡象！無既，每日掃幾次地咁啦…
-
肥喵磅重（2012年9月）
平時有唔少機會抱喵，其實一開始就知道兩位主人好重，尤其是楊生，抱落去仲重過公司喵好多好多…之前用過屋企個浴室磅黎磅，結果係18磅！不過個磅本身好舊，唔知準唔準，所以都只係估估下既啫。
直到今日屋企突然多左部電視，擺放多時既Wii終於出山喇！配合埋Wii Fit Plus，我好高興喺呢度同大家宣布兩位主人既重量：
楊太係 4.6kg = 10.1lb
楊生係 6.6kg = 14.5lb
欽此，退朝！